《2折入主半島酒店》

大酒店集團(0045.HK)，係半島酒店嘅母公司，集團已經成立150週年，並係香港、北京、紐約、芝加哥、東京、曼谷、馬尼拉、上海、洛杉磯、巴黎等十個城市經營半島酒店。

分析大酒店集團(0045.HK)，唔可以齋睇酒店業務，因為酒店業務一啲都唔吸引，正如佢1995年上市，當時股價9元左近，22年後，股價依然得9元，廿幾年嚟得個桔。不過唔緊要，大酒店性感之處係佢手頭上的優質資產。

大酒店(0045.HK)手上優質資產如下：

-. 「淺水灣影灣園」，前身係淺水灣酒店，其後改變土地用途，現為99.6萬平方呎嘅海景豪宅（另商場6.2萬平方呎），合共105.8萬呎。集團公布估值為169億元。咁計返呎價都係1.6萬蚊一呎，諗下就知冇可能，呢個價根本係吹水價，嚴重被低估。用鄰近嘅「麗景園」作reference，麗景園trade緊2.7萬蚊一呎。有乜理由同區嘅影灣園會低水40%？如果用2.7萬蚊一呎去計，咁單是影灣園已經值270億，仲有影灣商場未計數，咁淨係淺水灣呢舊資產最少都值300億，保守估計，係現在大酒店（0045.HK)市值嘅2倍！

-. 「香港半島酒店」，位於梳士巴利道嘅半島酒店建成於1928年，當時為一戰後的復甦期，建築成本300萬，現在估值為120億。附近重建中嘅新世界中心估值為300億，半島嘅估值就算打個5折，都值150億，更何況咁靚嘅位，又點止150億？集團明顯要禁低旗下物業的估值！

-. 「聖約翰大樓」，位於中環花園道，樓高21層，是山頂纜車嘅總站，集團給出最新估值為10億。我用最近成交嘅一線商業大厦價作reference:
👉🏻「美國萬通大厦」，位於灣仔告士打道，樓高28層，於2016年以125億成交。

👉🏻「大新金融中心」，位於灣仔告士打道，於2016年以100億成交。

👉🏻「夏愨大廈」，位於灣仔告士打道，樓高27層，其中16層計劃以80億出售。

👉🏻「中環中心」，位於皇后大道中，樓高73層，其中75%權益計劃以300億出售。

因此，中環及灣仔一帶的甲級地段寫字樓，成交呎價係3-4萬元。那麼，「聖約翰大樓」總面積為71,400呎，對應估值為21-29億，並非集團透露的10億。

淨係呢幾項香港物業，估值最少高達470億，係市值嘅3.3倍。當中還未計及「山頂凌霄閣」，「紐約，王府，東京，芝加哥，曼谷，馬尼拉，巴黎，比華利山的半島酒店」，加加埋埋，大酒店總資產最少值620億，呢個估值已經相當保守。對應返，大酒店（0045.HK)真實PB只有0.22倍。

信置早前用咗7億入股大酒店，我相信唔會單純為咗投資，So far 我咁大個人未見過「導彈射烏蠅」，入得去，肯肯定有後著，大酒店嘅資產實在太吸引，7億現金可揸住價值31億嘅資產，怕乜揸？嘉道理家族持股53.10%，擁有絕對控制權，要挑戰嘉道理家族就冇乜可能，但入咗局，就有機會俾壓力佢哋䆁放價值，到時，随便䆁售一件資產，特別股息分分鐘高過股價。各位，空穴來風，好戲在後頭，睇完戲，等收錢。

利申，持有大酒店集團（0045.HK）

#用最簡單嘅方法投資


廣告時間
白身公子Facebook page: (如喜歡嘅，請like&share)

https://m.facebook.com/hkcommoners/