「我最柒嘅一次投資經歷」

我第一次接觸股票係2009年，買入嘅第一隻股份叫：「蒙古能源」(00276.HK)，人稱「中華第一大妖股」，最高峰時，市值達260億。其後，因風水佬陳振聰被call loan，條友冇錢還，高盛被逼斬倉，從此神話破滅，世人現稱「蒙能」為「蒙撚」。

2009年夏，我被蒙能嘅妖性深深吸引，於是all in買入兩萬股，我嘅買入價係2.5港元，其後升到4蚊，我冇走，因為我對佢好有信心。再之後，佢跌返到我買入價，我心諗，冇理由高位跌咗50%仲會跌，所以我冇止蝕，然後，就沒有然後了。

呢8年間，「蒙撚」不斷合股，我當年本金係5萬，今日得返620蚊，8年蝕咗99%，後知後覺嘅我交完學費俾「蒙撚」後，才靜下心來睇佢份financial report ，睇完我笑咗出聲，我笑自己抵死！

Recall 少少歷史，經歷完08海嘯，總理溫伯伯大搞基礎建設，當年資源股當道，蒙能好巴閉，食住個勢，聲稱係蒙古國擁有半個香港咁大嘅礦場，佢又有大孖沙鄭氏家族撐場，風頭一時無兩。

2009年年報顯示，蒙能聲稱可開採的礦資源為1億5千萬吨，計劃每年生產800萬吨，預計收入數以十億。但我越睇越唔路，當睇到員工數目，我終於徹底認輸了，集團公布總員工數目是255名，我當所有員工都係礦工，連主席魯連城都落埋手掘，如果要hit target每年800萬吨，咁就算呢256條友7x24不眠不休，平均每人每小時要掘210吨！！！！！！

睇返佢支出，又冇特別列明設備開支，睇返附註才發現成條數連埋物業，七除八扣下，可以講連設備都冇。頂，咁點掘呀？？？？除咗神之馬壯，冇人可以徒手每小時掘210吨礦物。

講到呢度，故事完結了，「蒙撚」教曉我，做人要有common sense。自此，我提自己，中伏唔緊要，但要練精，學識輸，就曉贏。