媽咪，點解香港後面要加 (中國) 嘅?

有個𡃁妹，係佢媽咪Set up新iPhone嘅時候問:「媽咪，點解香港後面要加 (中國) 嘅?」佢媽咪答：「係咁㗎，香港屬於中國嘅！」

係囉，𡃁妹問得啱，點解Hong Kong 要有 (China)跟尾？ 由細到大，去旅行被問到 Where are you from，都係毫不猶豫答 from Hong Kong，答案簡單易明，唔會有任何附加地域。

但究竟幾時開始，我哋接受咗Hong Kong 後面加上(China)，初頭都以為係門面嘢，不足掛齒，但久而久之，Hong Kong (China) 變成一個不可逆轉嘅意識形態。

我特別鐘意九十年代嘅香港，因為果陣時嘅香港好local，拍嘅戲、唱嘅歌，唔需要遷就人哋嘅口味，總之就係用最local嘅方式演出。話之佢聽唔聽得明廣東話，鐘意聽嘅，唔該自行學習我哋嘅語言，果陣時嘅Hong Kong 係真Hong Kong。

當年嘅港府亦好打得，九七金融風暴，大鱷索羅斯橫掃亞洲幾個大國，途經之地生靈塗炭，但嚟到香港就俾港府用外匯儲備挾死，令佢老人家老羞成怒。

Recall 歷史係想同大家講，香港，曾經好揪得！到咗千禧年，唔知邊條茂利提議食北水，成日話咩「背靠祖國，面向世界」，結果，北水係糖衣毒藥，食到陽痿。

Hong Kong (China)，背靠了祖國，卻放棄了全世界！呢點唔難證明，你睇下香港有冇全球響朵嘅brand?? 我同你講，一個都冇。可能你會反駁，香港係靠金融搵食，冇brand 好正常。Ok，咁睇下港交所，自2010年AIA上市後，冇一間見得人嘅外國企業嚟Hong Kong (China) 上市，呢個地方已經淪為大陸佬嘅提款機，禁完就走，慘過公廁。

Hong Kong (China) 已經變曬質，係呢度，調查者同被調查者可以一齊研究調查方向，但社會覺得冇問題；係呢度，打住法治嘅口號，加插選舉確認書、DQ議員宣誓，但社會覺得冇問題；係呢度，用一個月糧買一塊階磚，然後不吃不喝供足30年，但社會覺得冇問題；係呢度，大部分 U grad 就即刻投考公務員，只求安穩，但社會覺得冇問題；係呢度，首富依然係果幾條地產佬，但社會覺得冇問題！

夫哀莫大於心死，老老竇竇，Hong Kong 已經唔存在，Hong Kong(China) 癈到嘔，China (Hong Kong) is coming soon.......