《考公務員會被人睇唔起》

幾年前的夏天，我係墨爾本一間電力公司實習，閒言間，澳洲同事問我大學畢業後有何去向。我說打算投考公務員，他們當堂把聲線提高八度問咗句：「What? 」接著措辭嚴厲咁講：「剛畢業就想打政府工咁冇出息？你咁年輕，世界咁大，點解一讀完書就要俾啲giant framework局限自己？」

我答他們：「在香港，大部分畢業生都打算做公務員，因為薪高糧準，福利又好，比起出邊日捱夜捱好得多。」跟住有位manager搭嘴：「點解唔考慮創業？香港連最有productivity 嘅fresh grad都look for咁冇productivity嘅工種，咁遲早玩完。」

事隔多年，招聘公務員的post依舊會在Facebook洗板，每當有新招聘，身邊的朋友都會mon到實一實，即使已有穩定工作嘅都會狗衝，他們深信打政府工才是王道。

見到咁嘅趨勢，我就知我們冇資格抱怨地產霸權，因為我們根本就是《Who moved my cheese》裏頭那隻劃地為牢的小矮人，不肯接受改變，安於現狀，最終死於迷宮也是合情合理。放眼世界，首富之位早已由地產大亨轉移至科技怪傑，奈何，香港首富依舊是幾位黃台之瓜，點解？因為他們根本冇對手，有能力顛覆他們嘅年輕人，只是渴望AO/EO/跳point，咁班老野想被取替都難。世界就是如此殘酷，安於現狀，不顛覆別人，別人就會來顛覆你，咁地產商係沙頭角賣一萬蚊一呎，我們又怨得了誰。

我有一位朋友，滿腦子都是idea，一時想發展「共享office」，一時又話搞「情侣party room」。結果，佢走咗去考入境，我問他:「你不是想創業嗎，為何安於打份政府工？」他答我:「淆底，害怕失敗，到時就偷雞不成蝕把米。」

他就是馬雲講果種人「晚上想著千萬條路，隔天早上起來走原路。」講到尾，安於份政府工，唔敢出嚟創業嘅朋友，根本係冇自信，佢哋有idea，有sense，知道世界嘅trend，但就係冇勇氣做，總係不斷顧慮，不斷想萬一。

前幾天，我和朋友去睇舖位，想搞點小生意，有位中年業主跟我說：「靚仔，做生意就係賭博，唔落場永遠冇機會贏，既然落得場就要俾心機做，你哋咁年輕，冇錢就係你哋嘅優勢，唔好劣，輸曬身家都只係呀姐我嘅零頭，好快搵得返，年輕，就係你哋最佳嘅資產。」

霸氣呀姐講得啱，年輕係我哋嘅資產，越老越折舊。奈何，香港太多年輕人把優質資產投資在一潭死水裏。人人都中曬毒，每當招聘公務員的post多一個like and share，香港就沉淪多一嘢，然後，就沒有然後了。